मुखेडमध्ये वाळू माफियांचा हैदोस; प्रशासन झोपेत? संयुक्त पथक नेमून तात्काळ कठोर कारवाईची मागणी
मुखेड (प्रतिनिधी) – ४ मार्च २६
मुखेड शहरातून सुरू असलेल्या अवैध वाळू वाहतुकीविरोधात तात्काळ कठोर कारवाई करण्यात यावी, अशी मागणी सचिन इंगोले यांनी प्रशासनाकडे केली आहे. या संदर्भात आज दि ०४ मार्च रोजी त्यांनी सविस्तर निवेदन सादर केले आहे.
निवेदनानुसार, मुखेड शहरातून लातूर, उदगीर, शिरूर ताजबंद, जांब बु., बाहेरहाळी रोड, सलगरा तसेच खरबखंडगाव–चांडोळा मार्गे शेकडो टिप्परद्वारे वाळूची वाहतूक केली जात आहे. अनेक टिप्पर एकाच पावतीवर दोन–दोन वेळा दहा ते बारा ब्रास क्षमतेपेक्षा अधिक वाळू भरून शासनाचा महसूल बुडवत असल्याचा आरोप करण्यात आला आहे.
सदर टिप्पर भरधाव वेगाने धावत असल्याने अपघाताची शक्यता वाढली असून नागरिकांच्या जीवितास धोका निर्माण झाला आहे. नियमानुसार वाळू वाहतूक सूर्यास्तानंतर ते सूर्योदयापूर्वी या कालावधीतच करणे अपेक्षित असताना, संबंधितांकडून दिवसरात्र २४ तास वाहतूक सुरू असल्याचे निवेदनात नमूदकरण्यात आले आहे. काही शासकीय अधिकाऱ्यांना हाताशी धरून हा कारभार सुरू असल्याचा गंभीर आरोपही करण्यात आला आहे.
यासोबतच, मुखेड तहसील अंतर्गत महसूल विभागाने मौजे सलगरा फाटा, कमळेवाडी फाटा व जांब येथे महसूल व पोलीस विभागाचे संयुक्त तपासणी पथक तात्काळ बसवावे, अशी मागणी करण्यात आलीआहे. या संयुक्त पथकाकडून लाल व काळी रेती वाहतूक करणाऱ्या सर्व वाहनांच्या पावत्या तपासाव्यात. तसेच आरटीओ नियमांनुसार वाहनांची सर्व कागदपत्रे तपासून वाहनांचे वजन काट्यावर मोजमाप करण्यात यावे.
क्षमतेपेक्षा जास्त वाळू भरून वाहतूक करणाऱ्या, नियमबाह्य पद्धतीने वाहतूक करणाऱ्या तसेच एकाचपावतीवर दोन–दोन वेळेस वाळू वाहतूक करणाऱ्या वाहन धारकांवर व संबंधित वाळू माफियांवर दंडात्मकव कठोर कारवाई करण्यात यावी, अशी ठाम मागणी इंगोले यांनी केली आहे.
प्रशासनाने तात्काळ कारवाई करून अवैध वाळू वाहतूक पूर्णपणे बंद करावी, अन्यथा जनआंदोलन उभारण्यात येईल, असा इशाराही निवेदनात देण्यात आला आहे.
या वेळी शाम प्रदिपराव इंगोले, शंकर वडेवार, बालाजी कुटे , मनोज इंगोले, सुमित इंगोले, योगेश जाधव, सलमान पठाण, राजु कोनापुरे, दिपक जुन्ने आदी सामाजिक कार्यकर्ते या वेळी उपस्थित होते
