▫️शहरातील अनेक भागात शिरले पुराचे पाणी
नांदेड प्रतिनिधी:- दि. २४ सप्टेंबर
गोदावरी पात्रात पाणी सोडण्याने शहरातील अनेक भागात बॅक वॉटर शिरले असून अनेक कुटुंबांना स्थलांतरित करण्यात आले आहे. त्याचवेळी शहरातील दूल्हेशाह रहमान नगर येथे शेख मिन्हाज शेख साजिद वय १६ वर्षीय युवकाचा या पाण्यात बुडून मृत्यू झाल्याची घटना बुधवारी सकाळी घडली आहे. स्थानिक नागरिकांनी या युवकाचा बाहेर काढला. या घटनेने एकच खळबळ उडाली आहे.
विष्णूपुरी प्रकल्पातून सध्या अडीच हजार क्युसेस वेगाने गोदावरी पात्रात पाणी सोडण्यात येत आहे. परिणामी गोदावरी नदी पात्राबाहेर आली असून शहरातील अनेक सखल भागात पाणी शिरले आहे. वसरणी येथील पंचवटीनगर, जुन्या नांदेडातील काला पूल, गौतम नगर खडकपुरा, दूल्हेशहा रहमान नगर आदी भागात मोठ्या प्रमाणात बॅक वॉटर शिरले आहे. याच बॅक वॉटरमध्ये बुधवारी सकाळी शेख मिन्हाज शेख साजिद वय १६ वर्षे हा युवक पाण्यामध्ये बुडाला. तो बुडाल्याची माहिती मिळताच स्थानिक नागरिकांनी त्याचा मृतदेह पाण्या बाहेर काढला. या घटनेने एकच खळबळ उडाली आहे. शहरात महापालिकेकडून मंगळवारी सायंकाळ पासून खबरदारीचा इशारा देण्यात आला होता. गोदावरी नदीचे पाणी शहरातील सखल भागात येणार आहे, नागरिकांनी खबरदारी घ्यावी याबाबत माहितीही देण्यात आली होती. मात्र बुधवारी सकाळी ही दुर्दैवी घटना घडली. गोदावरी जीव रक्षक दलातील सैय्यद नूर, सैय्यद इक्बाल, शेख लतीफ आणि सैय्यद विकार यांनी बॉडी बाहेर काढली .मात्र त्या युवकाचा मृत्यू झाला होता.
