नांदेड प्रतिनिधी:- श्रमिक एकता न्यूज़ ०९ एप्रिल २६
शहराच्या सुरक्षिततेवर प्रश्नचिन्ह निर्माण करणारी एक थरारक घटना ४ एप्रिल रोजी शासकीय रुग्णालयात घडली. पूर्व वैमनस्यातून एका तरुणाची पोलिसांच्या डोळ्यां देखत हत्या करण्यात आली असून, या प्रकरणी कर्तव्यात कसूर केल्याचा ठपका ठेवत दोन पोलीस कर्मचाऱ्यांवर निलंबनाची गाजपडली आहे.
शहरातील ई–स्क्वेअर परिसरात झालेल्या एका वादात सय्यद आवेज (२७) आणि मोहम्मद अरबाज हेदोघे गंभीर जखमी झाले होते. पोलिसांनी त्यांना तातडीने उपचारासाठी शासकीय रुग्णालयात दाखल केले. मात्र, आरोपीचा पाठलाग थांबला नव्हता. आपल्या भावाच्या (अरिजीतसिंग) खुनाचा बदला घेण्याच्या ईर्ष्येने पेटलेला राजेश चव्हाण हा हातात तीक्ष्ण शस्त्र घेऊन थेट रुग्णालयात घुसला.
रुग्णालयातील अपघात विभागाबाहेर पोलीस तैनात असतानाही, आरोपीने संतापच्या भरात सय्यद आवेजवर सपासप वार केले. या भीषण हल्ल्यात आवेजचा जागीच मृत्यू झाला. शासकीय रुग्णालया सारख्या गजबजलेल्या आणि संवेदनशील ठिकाणी पोलिसांच्या उपस्थितीतच ही हत्या झाल्याने सर्वत्र खळबळ उडाली आहे.
या गंभीर घटनेची दखल घेत पोलीस प्रशासनाने तातडीने कारवाईचे पाऊल उचलले आहे. घटनेच्या वेळी उपस्थित असलेल्या दोन पोलीस कर्मचाऱ्यांनी हलगर्जीपणा केल्याचे प्राथमिक चौकशीत समोर आले आहे.
या घटनेमुळे नांदेडमधील कायदा व सुव्यवस्थेवर पुन्हा एकदा चर्चा सुरू झाली असून, रुग्णालयातील सुरक्षा व्यवस्थेवरही मोठे प्रश्नचिन्ह निर्माण झाले आहे.
