मुखेडचे पोलीस निरीक्षक लक्ष्मण केंद्रे यांच्यावर गंभीर आरोप; तात्काळ बडतर्फ करण्याची सामाजिक संघटनांची मागणी!
▫️अमानुष छळ, खंडणी आणि अवैध धंद्यांना पाठबळ दिल्याचा तक्रारीत उल्लेख; २८ मे रोजी नांदेड येथे उपोषणाचा इशारा
मुखेड प्रतिनिधी : – श्रमिक एकता न्यूज़ १९ मे २६
मुखेड पोलीस स्टेशनचे पोलीस निरीक्षक लक्ष्मण व्यंकटराव केंद्रे यांच्या भ्रष्टाचारी, अत्याचारी कारभारा विरुद्ध आणि सामान्य जनतेवर होत असलेल्या अमानुष छळाविरुद्ध सामाजिक कार्यकर्त्यांनी थेट विशेषपोलीस महानिरीक्षक (नांदेड परिक्षेत्र) यांच्याकडे लेखी तक्रार नोंदवली आहे. पोलीस निरीक्षक केंद्रे यांनासेवेतून तात्काळ बडतर्फ करून त्यांच्यावर फौजदारी गुन्हा दाखल करावा, अशी मागणी या पत्राद्वारे करण्यात आली असून, मागणी मान्य न झाल्यास तीव्र आंदोलनाचा इशारा देण्यात आला आहे.
तक्रारदारांनी आरोप केला आहे की, मुखेड पोलीस स्टेशनमध्ये तक्रार घेऊन जाणाऱ्या सामान्य नागरिकांनाच बेदम मारहाण केली जाते. त्यांच्याकडून मोठ्या प्रमाणावर पैसे उकळले जातात आणि पैसेन दिल्यास खोट्या गुन्ह्यांमध्ये अडकवून जेलमध्ये टाकण्याची धमकी दिली जाते.
मुखेड परिसरात दररोज ५० ते ६० गाड्यांची अवैध रेती वाहतूक सुरू असून, एका गाडीमागे तब्बल ३०,००० रुपये घेऊन या वाहतुकीला थेट पाठबळ दिले जात असल्याचा खळबळजनक आरोप पत्रात करण्यात आला आहे.
मुखेड शहरात सर्रास सुरू असलेले सट्टा बाजार, पत्ते आणि गांजा विक्री यांसारख्या अवैध धंद्यांना पोलीस निरीक्षकांचाच वरदहस्त असल्याचा दावा तक्रारदारांनी केला आहे.
विशाल राजेंद्र सांगवे या सामान्य नागरिकावर झालेल्या अन्यायाबाबत १३ एप्रिल २०२६ रोजी प्राप्त झालेल्या अर्जाचा हवाला देत तक्रारदारांनी म्हटले आहे की, पीडित माणसावर प्रचंड दबाव टाकून, त्याला ५ लाख रुपये देऊन उपचारासाठी पुणे येथील रुग्णालयात पाठवण्यात आले आहे, जेणेकरून या गंभीर प्रकरणावर पडदा टाकता येईल.
या अन्यायाविरुद्ध बहुजन समाज पार्टीचे हणमंतभाऊ अंगदराव मामीलवाड ठाणेकर (उपाध्यक्ष, माहितीअधिकार कार्यकर्ता महासंघ) आणि सचिन पाटील इंगोले (संस्थापक अध्यक्ष, राजमुद्रा सामाजिकसंघटना) यांनी आक्रमक भूमिका घेतली आहे.
“या भ्रष्ट कारभाराची चौकशी करून पोलीस निरीक्षक केंद्रे यांना तातडीने निलंबित व बडतर्फ करावे. आमच्या जीवाला या पोलीस अधिकाऱ्यापासून धोका असून, काही बरेवाईट झाल्यास तेच जबाबदार राहतील. प्रशासनाने योग्य कारवाई न केल्यास २८ मे २०२६ रोजी विशेष पोलीस महानिरीक्षक कार्यालय, नांदेड समोर उपोषण केले जाईल आणि त्यानंतरही न्याय न मिळाल्यास ३ जून २०२६ पासून मुंबईतील आझाद मैदान येथे आमरण उपोषण करण्यात येईल,” असा इशारा अर्जदारांनी दिला आहे.
या गंभीर तक्रारीमुळे पोलीस वर्तुळात प्रचंड खळबळ उडाली असून, आता वरिष्ठ पोलीस प्रशासन यावरकाय कारवाई करणार, याकडे संपूर्ण मुखेड तालुक्याचे लक्ष लागले आहे.
