आंबुलगा सेवा सहकार सोसायटीत सेक्रेटरीचा अजब कारभार! संचालकांना अंधारात ठेवून ठरावावर घेतल्या सह्या; मुखेड सहाय्यक निबंधकांकडे तक्रार

▫️कर्ज मंजुरीचे आमिष दाखवून ‘अज्ञानपणाचा’ फायदा!

▫️बाजार समितीच्या सभापतींच्याच गावात अंधेर नगरी?

▫️निबंधक कारवाई करणार की अर्ज लालफितीत अडकणार?

मुखेड प्रतिनिधी :- श्रमिक एकता न्यूज़ १५ जून २६

तालुक्यातील मौजे आंबुलगा येथील सेवा सहकार सोसायटीमध्ये सेक्रेटरीच्या मनमानी आणि अजब कारभाराचा धक्कादायक प्रकार समोर आला आहे. संचालक मंडळाची दिशाभूल करून, कोणतीही पूर्वसूचना किंवा बहुमताची रीतसर बैठक न घेता, खरेदी–विक्री संघाचा ठराव बेकायदेशीर रित्या मंजूरकरून घेतल्याचा खळबळजनक आरोप संचालकांनीच केला आहे. याप्रकरणी संतप्त संचालकांनी १० जून रोजी मुखेड येथील सहाय्यक निबंधक कार्यालयात लेखी तक्रार दाखल केली असून, सोसायटीत नेमके काय शिजतेय? असा सवाल आता उपस्थित केला जात आहे.

मिळालेल्या माहितीनुसार, आंबुलगा सेवा सहकार सोसायटीच्या सेक्रेटरीने खरेदी–विक्री संघाचा ठराव मंजूर करून घेण्यासाठी सर्व नियम धाब्यावर बसवले. कोणतीही अधिकृत बैठक न घेता, सेक्रेटरीने प्रत्येक संचालकाची वैयक्तिक भेट घेतली. “तुमचे कर्ज मंजूर करून देतो,” असे खोटे आमिष दाखवूनआणि त्यांच्या अज्ञानपणाचा गैरफायदा घेऊन हुशारीने खरेदी–विक्री संघाच्या ठरावावर स्वाक्षऱ्या लाटल्या. हा प्रकार उघडकीस आल्यानंतर सोसायटीच्या वर्तुळात एकच खळबळ उडाली आहे.

विशेष आणि गंभीर बाब म्हणजे, या आंबुलगा सेवा सहकार सोसायटीचे चेअरमन हे दुसरे तिसरे कोणी नसून मुखेड कृषी उत्पन्न बाजार समितीचे विद्यमान सभापती बालाजीराव पाटील अंबुलगेकर हे आहेत. मुखेड तालुक्याच्या कृषी आणि सहकार क्षेत्राचे नेतृत्व करणाऱ्या सभापतींच्या स्वतःच्या गावातील सोसायटीत जर संचालकांचा असा ‘अज्ञानपणाचा‘ फायदा घेऊन फसवणूक केली जात असेल, तर कृषीउत्पन्न बाजार समितीत नेमका कसा कारभार चालत असेल? तिथे कोणता काळा बाजार होत असेल? अशी भीती आणि काळजी आता सर्वसामान्य शेतकऱ्यांमधून व्यक्त केली जात आहे.

सेक्रेटरीच्या या मनमानी कारभारा विरोधात काही जागरूक संचालकांनी थेट सहाय्यक निबंधक कार्यालय गाठून लेखी तक्रार नोंदवली आहे. आता या गंभीर प्रकरणावर मुखेडचे सहाय्यक निबंधक काय भूमिका घेतात? दोषी सेक्रेटरीवर कडक कायदेशीर कारवाई होणार की, आलेला तक्रार अर्ज नेहमी प्रमाणे सरकारी लालफितीत (दप्तरदीरंगाईत) धूळ खात पडणार? याकडे आता संपूर्ण तालुक्याचे लक्ष लागून राहिले आहे.

“कर्जाचे आमिष दाखवून संचालकांची दिशाभूल करणाऱ्या आणि नियमबाह्य ठराव घेणाऱ्या सेक्रेटरीवर तात्काळ कठोर कारवाई व्हावी, अन्यथा तीव्र आंदोलन छेडले जाईल.” — तक्रारदार संचालक, आंबुलगा सेवा सहकार सोसायटी