मुखेड पोलिसांची मोठी कारवाई: ३५.५९ लाखांचा मुद्देमाल जप्त; अवैध वाळू आणि गुटखा माफियांवर धडक कारवाई

▫️३५ लाखांचा मुद्देमाल जप्त: पो.उप.नि. अभिजीत तुतूरवाड यांच्या माहितीवरून गुटख्यावर छापा, तर हायवा टिप्परही पकडला.

श्रमिक एकता न्यूज़ नेटवर्क मुखेड : १२ जुलै २६

नांदेड जिल्ह्याचे पोलीस अधीक्षक डॉ. निलाभ रोहन यांच्या मार्गदर्शनाखाली अवैध धंद्यांविरुद्ध सुरू असलेल्या विशेष मोहिमे अंतर्गत मुखेड पोलिसांनी मोठी कारवाई केली आहे. पोलिसांनी अवैध रेतीवाहतूक करणारा एक हायवा टिप्पर आणि प्रतिबंधित गुटखा असा एकूण ३५ लाख ५९ हजार १०० रुपयांचा मुद्देमाल जप्त करून दोघांना बेड्या ठोकल्या आहेत.

दिनांक १० जुलै २०२६ रोजी सायंकाळी ७.०० वाजताच्या सुमारास पोलीस उपनिरीक्षक अभिजीत तुतूरवाड यांना त्यांच्या गुप्त बातमीदारां मार्फत गोपनीय माहिती मिळाली होती. मौजे बेरळी फाटा (ता. मुखेड) येथे एका व्यक्तीकडे प्रतिबंधित गुटखा असून तो त्याची विक्री करत असल्याची पक्की माहिती त्यांना मिळाली.

या माहितीच्या आधारे मुखेड पोलिसांनी सापळा रचून पंचांसमक्ष छापा टाकला. त्यावेळी तिथे एका व्यक्तीकडे १४,१०० रुपये किमतीचा प्रतिबंधित गुटखा आढळून आला. पोलिसांनी सदर गुटखा जप्तकेला आहे. आरोपी संभाजी जयवंत शिंदे (वय १९ वर्षे, रा. बेळी, ता. मुखेड, जि. नांदेड या विरुद्ध पोलीस ठाणे मुखेड येथे गु.र.नं. २१३/२०२६ नुसार कलम १२३, २७५, २२३ (भा.न्या.सं.) सह ५९(४), २६(२), २७, २३, ३०(२)(अ) अन्न सुरक्षा व मानके प्रमाणे गुन्हा नोंदवण्यात आला असून आरोपीस अटक करण्यात आली आहे.

दुसरी कारवाई त्याच दिवशी, १० जुलै २०२६ रोजी सायंकाळी ५.०० वाजताच्या सुमारास मौजे बेटमोगरा येथील पेट्रोल पंपासमोर करण्यात आली. हायवा क्र. TS15UE0444 मधून अवैध रेती वाहतूक होत असल्याची माहिती मिळाल्यावर पोलिसांनी सदर टिप्पर अडवून त्याची पाहणी केली.

त्यामध्ये विनापरवाना अवैध लाल रेती आढळून आली. पोलिसांनी अंदाजे ०९ ब्रास रेती (किंमत ४५,०००रुपये) आणि रेतीची वाहतूक करणारा हायवा टिप्पर (किंमत ३५,००,००० रुपये) असा एकूण३५,४५,००० रुपयांचा मुद्देमाल जप्त केला आहे.

अटक आरोपी (चालक) अजित पंढरीनाथ पाटील (वय ३५ वर्षे, रा. पिंपळगाव, ता. देगलूर) या प्रकरणी मुखेड पोलीस ठाण्यात गु.र.नं. २१४/२०२६ नुसार कलम ३०३(२) BNS सह कलम ४८(७), ४८(८) जमीनमहसूल अधिनियमाप्रमाणे गुन्हा दाखल करण्यात आला आहे.

सदर दोन्ही कारवाया मा. पोलीस अधीक्षक डॉ. निलाभ रोहन, अप्पर पोलीस अधीक्षक सुरज गुरव आणि उपविभागीय पोलीस अधिकारी (देगलूर). किरण पोफळघट यांच्या मार्गदर्शनाखाली करण्यात आल्या.

या मोहिमेत मुखेड पोलीस स्टेशनचे पोलीस निरीक्षक चिंतांबर कामठेवाड, पो.उप.नि. गणेश माने, पो.उप.नि. अभिजीत तुतूरवाड, तसेच पोलीस अंमलदार यादव इबितवार, शंकर बेलाडे, वीरभद्र पाटील, मन्मथ गौड, आणि अमोल सुंडगे यांनी सहभाग घेतला.

नांदेड जिल्हा पोलिसांनी जनतेला आवाहन केले आहे की, कोणत्याही प्रकारची अवैध गौण खनिजवाहतूक, साठवणूक तसेच अवैध गुटखा वाहतूक व विक्री बाबत माहिती आढळल्यास नागरिकांनी तात्काळ जवळच्या पोलीस ठाण्यात किंवा पोलीस नियंत्रण कक्षाला माहिती द्यावी. अशा अवैधकृत्यांविरुद्ध कठोर कायदेशीर कारवाई केली जाईल.