◽️निष्काळजीपणे कार चालवणाऱ्या शिक्षकावर मुक्रमाबाद पोलिसांत गुन्हा दाखल
श्रमिक एकता न्यूज़ मुखेड/बाराहाळी : १७ ऑगस्ट २६
पायी चालणाऱ्या एका ३१ वर्षीय तरुणाला भरधाव कारने पाठीमागून जोराची धडक दिल्याने त्याचा जागीच मृत्यू झाल्याची हृदयद्रावक घटना बाराहाळी–वडगाव राष्ट्रीय महामार्गावर शनिवारी सायंकाळी ७ वाजेच्या सुमारास घडली. या ‘हिट अँड रन‘ प्रकरणी बेफिकीरीने कार चालवणाऱ्या एका शिक्षकावर मुक्रमाबाद पोलीस ठाण्यात गुन्हा दाखल करण्यात आला आहे. फयाज जावेदसाब शेख (वय ३१, रा. बाराहाळी) असे मयत तरुणाचे नाव असून ते मुंबईत पोस्टमास्तर म्हणून कार्यरत होते.
पोलिसांकडून मिळालेल्या माहितीनुसार, मूळचे बाराहाळी (ता. मुखेड) येथील रहिवासी असलेले फयाज शेख हे मुंबई येथे पोस्टमास्तर या पदावर कार्यरत होते. काही दिवसांपूर्वीच ते कामा निमित्त आपल्या गावी आले होते. शनिवारी सायंकाळी ७ वाजेच्या सुमारास ते नेहमीप्रमाणे फेरफटका मारण्यासाठी बाराहाळीते वडगाव राष्ट्रीय महामार्गावरून पायी जात होते.
ते ‘योगायोग बार अँड रेस्टॉरंट‘ जवळ आले असता, वडगावहून बाराहाळीकडे भरधाव वेगाने येणाऱ्या एका मारुती सुझुकी अल्टो कारने (क्र. एम.एच. २६ – बी.एक्स. ७११६) त्यांना पाठीमागून जोराची धडक दिली. या अपघाताची तीव्रता इतकी भयंकर होती की, फयाज शेख यांच्या डोक्याला गंभीर मार लागला आणि त्यातच त्यांचा जागीच मृत्यू झाला.अपघाताची माहिती मिळताच मुक्रमाबाद पोलीस ठाण्याचे सहाय्यक पोलीस निरीक्षक (सपोनि) राजू चव्हाण यांनी तात्काळ घटनास्थळी धाव घेऊन पंचनामा केला. याप्रकरणी मयताची पत्नी सिमरन फयाज शेख (वय २४) यांनी मुक्रमाबाद पोलीस ठाण्यात फिर्याद दिली आहे.
त्यांच्या फिर्यादीवरून, निष्काळजीपणाने व हयगयीने कार चालवून मृत्यूस कारणीभूत ठरल्याप्रकरणी कारचालक तथा आरोपी शिक्षक संदीप माधवराव रावणगावकर याच्याविरुद्ध गुन्हा नोंदवण्यात आला आहे. भारतीय न्याय संहिता (BNS) २०२३ च्या कलम १०६ (१) आणि २८१ अन्वये (गुन्हा रजिस्टर नं. १२०/२०२६) हा गुन्हा दाखल करण्यात आला असून, या प्रकरणाचा पुढील तपास पोलीस उपनिरीक्षक ताहेर शेख हे करत आहेत.
