लग्नात डीजेवर नाचल्याच्या रागातून पत्नीची हत्या, पतीचीही आत्महत्या; तीन चिमुकली पोरकी
हिमायतनगर प्रतिनिधी:- श्रमिक एकता न्यूज़ १३ मे २६
नाती जोडली जातात ती विश्वासाने आणि प्रेमाने, मात्र संशयाचं भूत डोक्यात शिरलं की होत्याचं नव्हतंहोतं, याचाच प्रत्यय नांदेड जिल्ह्यातील हिमायतनगर तालुक्यात आला आहे. चुलत मेहुण्याच्या लग्नातपत्नी डीजेवर नाचली, या किरकोळ कारणावरून झालेल्या वादातून पतीने पत्नीची निर्घृण हत्या केली आणि त्यानंतर स्वतःही गळफास घेऊन जीवनयात्रा संपवली. या धक्कादायक घटनेमुळे बोरगडी तांडा परिसरात खळबळ उडाली असून तीन लहान मुलांचे छत्र हरपले आहे.
नेमकी घटना काय?
मिळालेल्या माहितीनुसार, मयत पायल विनोद राठोड (२७) आणि विनोद रंगराव राठोड (४०) हे दाम्पत्य भोकर तालुक्यातील फुलवाडी तांडा येथील रहिवासी होते. हिमायतनगर तालुक्यातील बोरगडी तांडा येथेचुलत भावाच्या लग्नासाठी ते आले होते. १० मे रोजी लग्नामध्ये पायल यांनी डीजेवर नृत्य केले, जे पती विनोदला आवडले नाही. याच कारणावरून दोघांमध्ये कडाक्याचे भांडण झाले.
लग्नानंतर पायल मुलांसह माहेरीच राहिल्या होत्या, मात्र विनोदचा राग शांत झाला नव्हता. मंगळवारी पहाटे ३ वाजेच्या सुमारास संधी साधून विनोदने धारदार चाकूने पायल यांचा गळा चिरून त्यांची हत्या केली. पत्नीचा खून केल्यानंतर त्याने गावाच्या शिवारात जाऊन एका झाडाला गळफास घेत आपलीही जीवनयात्रा संपवली. सकाळी कुटुंबीय उठल्यानंतर हा रक्तरंजित प्रकार उघडकीस आला.
या घटनेत राठोड दाम्पत्याच्या दोन मुली आणि अवघ्या ८ महिन्यांच्या चिमुकल्या मुलाने आई–वडील दोघांनाही गमावले आहे. घटनास्थळी आपल्या आई–वडिलांच्या मृत्यूचा आक्रोश करणाऱ्या याचिमुकल्यांना पाहून उपस्थित प्रत्येकाचे डोळे पाणावले होते. हिमायतनगर पोलिसांनी घटनास्थळी धावघेत पंचनामा केला असून याप्रकरणी पुढील तपास सुरू आहे.
एका लग्नाच्या आनंदाचे रूपांतर काही तासांतच दुःखात झाले. संतापाच्या भरात पतीने उचललेल्या या टोकाच्या पावलामुळे एका हसत्या खेळत्या संसाराचा अंत झाला असून, समाजातील वाढत्या असहिष्णुतेवर या घटनेने पुन्हा एकदा प्रश्नचिन्ह उपस्थित केले आहे.
