शेतीच्या नावाखाली काळा धंदा; मुखेड तालुक्यात ५ किलो गांजासह शेतकरी पोलिसांच्या जाळ्यात!
▫️पोलीस अधीक्षक अबिनाश कुमार यांच्या मार्गदर्शनाखाली गुन्हे शाखेचा दणका!
मुखेड प्रतिनिधी: श्रमिक एकता न्यूज़ २४ मे २६
मुखेड तालुक्यातील हिप्परगा (दे) शिवारात एका शेतकऱ्याने चक्क आपल्या शेतात विक्रीच्या उद्देशाने गांजाची बेकायदेशीर लागवड केल्याचा धक्कादायक प्रकार उघडकीस आला आहे. नांदेडच्या स्थानिकगुन्हे शाखेच्या पथकाने या शेतावर छापा टाकून तब्बल ५ किलो १९० ग्रॅम वजनाची गांजाची झाडे जप्तकेली आहेत. याप्रकरणी संशयित आरोपी शेतकरी गोविंद केरबा शिकारे याच्याविरुद्ध मुखेड पोलीस ठाण्यात गुन्हा दाखल करण्यात आला असून, या कारवाईमुळे तालुक्यात प्रचंड खळबळ उडाली आहे.
या धडक कारवाईची सविस्तर माहिती अशी की, स्थानिक गुन्हे शाखेचे पोलीस उपनिरीक्षक बळीराम दासरे यांना एका विश्वसनीय खबऱ्याकडून गोपनीय माहिती मिळाली होती. हिप्परगा (दे) येथीलशेतकरी गोविंद शिकारे याने स्वतःच्या शेतात चोरट्या मार्गाने गांजाची लागवड केली असून, तो त्याची विक्री करण्याच्या तयारीत आहे. माहिती मिळताच उपनिरीक्षक दासरे यांनी तात्काळ वरिष्ठ पोलीस अधिकाऱ्यांना याची कल्पना दिली.
वरिष्ठांकडून हिरवा कंदील मिळताच, स्थानिक गुन्हे शाखेच्या पथकाने हिप्परगा (दे) शिवारातील संबंधित शेतात छापा टाकला. पोलीस पथक शेतात पोहोचताच त्यांना तिथे गांजाची हिरवीगार झाडे डोलताना आढळली. पोलिसांनी चकित करत तात्काळ शासकीय पंचांसमक्ष घटनास्थळाचा रितसर पंचनामा केला. या छाप्यात १ लाख ३ हजार ८०० रुपये किमतीचा एकूण ५ किलो १९० ग्रॅम गांजा जप्तकरण्यात आला आहे.
सदरील धडक कारवाई नांदेडचे पोलीस अधीक्षक अबिनाश कुमार, अपर पोलीस अधीक्षक सूरज गुरवयांच्या थेट मार्गदर्शनाखाली करण्यात आली. यामध्ये स्थानिक गुन्हे शाखेचे पोलीस निरीक्षक अतुल भोसले, पोलीस निरीक्षक सूर्यमोहन बोलमवाड, पोलीस उपनिरीक्षक बळीराम दासरे, पोलीस अंमलदारमाधव केंद्रे, देवीदास चव्हाण, दिलीपकुमार चंचलवार, रितेश कुलथे, मोतीराम पवार आणि सुधाकर देवकते यांनी महत्त्वाची भूमिका बजावली.
पुढील तपास मुखेड पोलीस ठाण्याचे अधिकारी करत असून, या कारवाईमुळे परिसरातील अवैध धंदे करणाऱ्यांचे धाबे दणाणले आहेत.
