▪️माजी मंत्री फारुक पाशा आमदार चषक स्पर्धेचे थाटात उद्घाटन संपन्न
नांदेड/प्रतिनिधी-क्रिकेट सारख्या मैदानी क्रिडा स्पर्धांच्या माध्यमातून निरोगी शरीर व सामाजिक ऐक्यासाठी उपयुक्त ठरतात असे मत जिल्हा पोलीस अधीक्षक श्रीकृष्ण कोकाटे यांनी व्यक्त केले.
फारुख अहेमद मित्रमंडळाच्यावतीने आयोजित माजी मंत्री फारुक पाशा यांच्या स्मरणार्थ येथील श्री गुरु गोविंदसिंघजी स्टेडियममध्ये आमदार चषक क्रिकेट स्पर्धांचे उद्घाटन नांदेड जिल्हा क्रिकेट असोसिएशनचे अध्यक्ष माजी मंत्री डॉ.माधवराव किन्हाळकर यांच्या हस्ते करण्यात आले. यावेळी प्रमुख पाहुणे म्हणून जिल्हाधिकारी अभिजित राऊत, जिल्हा पोलीस अधीक्षक श्रीकृष्ण कोकाटे, अतिरिक्त पोलीस अधीक्षक अबिनाशकुमार, माजी मंत्री फारुक पाशा यांचे दोन्ही सुपुत्र फैसल पाशा, मोईज पाशा, नांदेड जिल्हा क्रिकेट असोसिएशनचे सचिव तथा माजी नगरसेवक प्रा.नंदु कुलकर्णी, माजी महापौर अजय बिसेन, नांदेड वार्ताचे संपादक ऍड.कॉ. प्रदीप नागापूरकर, वंचित बहुजन आघाडीचे उपाध्यक्ष गोविंद दळवी, शहराध्यक्ष आयुब खान, विठ्ठल गायकवाड आदी उपस्थित होते. यावेळी बोलतांना जिल्हा पोलीस अधीक्षक म्हणाले की, क्रिडा स्पर्धा ह्या शारिरीक, मानसिक, सामाजिक स्वास्थ संतुलनाचे कार्य करतात. तरुण पिढीमध्ये खिळाडू वृत्ती निर्माण झाल्यास पोलीस यंत्रणांवरचा ताण कमी होण्यास मदत मिळते. फारुख अहेमद मित्रमंडळाचा हा उपक्रम स्तुत्य असल्याचे गौरवोद्गारही त्यांनी यावेळी काढले. माजी मंत्री माधवराव किन्हाळकर यांनी फारुख अहेमद मित्रमंडळाने नांदेड जिल्ह्यात विकासाला चालना देणार्या माजी मंत्री फारुक पाशा यांच्यासारख्या नेत्याच्या नावे क्रिकेट स्पर्धा आयोजित करुन तरुणांमध्ये जुना इतिहास नेण्याचा स्तुत्य उपक्रम केला आहे. फारुक पाशा हे तीनवेळा नांदेडमधून निवडून आले. विधान परिषदेचे सदस्य, उपसभापती, माजी मंत्री होते. परंतु त्यांचे कार्य आजच्या पिढीला फारसे माहिती नाही. त्यांच्या कार्याचे स्मरण या निमित्ताने केल्याबद्दल त्यांनी फारुख अहेमद व त्यांच्या मित्रमंडळाचे कौतुक केले. तर जिल्हाधिकारी अभिजित राऊत यांनी किक्रेट सारख्या स्पर्धांच्या माध्यमातून तरुणांमध्ये शिस्त, जिद्द व चिकाटी निर्माण होते. अशा प्रकारच्या स्पर्धांमुळे शिस्तबद्ध समाज निर्मितीला मदत मिळेल अशी अपेक्षा व्यक्त केली. कार्यक्रमाचे प्रास्ताविक वंचित बहुजन आघाडीचे प्रदेश प्रवक्ते फारुख अहेमद यांनी तर सुत्रसंचलन उबेद बाहुसेन यांनी केले. या स्पर्धा आज 3 फेब्रुवारी पासून नाकाऊट पध्दतीने 11 फेब्रुवारी पर्यंत खेळल्या जाणार आहेत. स्पर्धेसाठी एकूण सोळा संघांमध्ये नाकाऊट पध्दतीने सामना होणार आहे. 11 फेब्रुवारी रोजी अंतिम सामना व मान्यंवरांच्या हस्ते बक्षीस वितरण होणार आहे. या स्पर्धेसाठी फारुख अहेमद मित्र मंडळाचे जावेद हाश्मी, महंमद फहीम, अथर मोमीन, मोईन रहिम, मो.कासीम, उबेद बाहुसेन, अहेमदबाबा बागवाले आदी परिश्रम घेत आहेत.
