नांदेड जिल्हा बँक निवडणुकीत मोठी चुरस; संचालक पदासाठी मुखेडचे आमदार डॉ. तुषार राठोड यांच्यासह दिग्गजांची उडी!
▫️आमदारांसह आजी-माजी लोकप्रतिनिधींची उडी; उमेदवारांच्या यादीत उद्या आणखी बड्या नावांची भर पडणार?
▫️२३ जागांसाठी आतापर्यंत ८० अर्ज दाखल; २६ जुलैला मतदान, तर २८ ला उधळणार गुलाल
श्रमिक एकता न्यूज़ नेटवर्क नांदेड: २९ जून २६
बहुचर्चित नांदेड जिल्हा मध्यवर्ती सहकारी बँकेच्या निवडणुकीत राजकीय वातावरण चांगलेच तापले आहे. बँकेच्या संचालक मंडळाच्या २३ जागांसाठी आतापर्यंत तब्बल ८० दिग्गजांनी शड्डू ठोकला असून, यात मुखेडचे आमदार डॉ. तुषार राठोड यांच्यासह जिल्ह्यातील तीन विद्यमान आमदारांचा समावेश आहे. उद्या (३० जून) उमेदवारी अर्ज दाखल करण्याचा शेवटचा दिवस असल्याने ही संख्या २०० च्या पारजाण्याची दाट शक्यता आहे.
तोट्यातून नफ्यात आलेल्या बँकेवर वर्चस्वाची लढाई मागील अनेक वर्षे तोट्याच्या गर्तेत अडकलेली नांदेड जिल्हा मध्यवर्ती बँक आता नवसंजीवनी घेत तब्बल साडेचार ते पाच कोटींच्या नफ्यात आली आहे. बँकेची आर्थिक स्थिती सुधारल्याने या महत्त्वाच्या संस्थेवर आपले वर्चस्व असावे, यासाठी जिल्ह्यातील आजी–माजी लोकप्रतिनिधी, माजी झेडपी अध्यक्ष, सदस्य आणि नगरसेवकांनी कंबर कसली आहे.
रिंगणातील प्रमुख चेहरे २९ जूनपर्यंत प्राप्त झालेल्या ८० अर्जांमध्ये बड्या राजकीय नेत्यांचा समावेश आहे. विशेषतः मुखेडचे आमदार डॉ. तुषार राठोड, किनवटचे आमदार भीमराव केराम आणि हदगावचे आमदार बाबुराव कदम या तीन विद्यमान आमदारांनी आपले अर्ज दाखल केले आहेत. यासोबतच माजी जि.प. अध्यक्ष दिलीप पाटील, नगरसेवक दिलीप कंदकुर्ते, माजी जि.प. सदस्य लक्ष्मण ठक्करवाड, मीनल पाटील, प्रणिता देवरे–चिखलीकर, मारोतराव कवळे, संगीता पाटील, राजेश देशमुख, अनिलपाटील, शिवकुमार भोसीकर आणि श्रावण भिलवंडे या दिग्गजांनीही संचालक पदासाठी दावा ठोकला आहे. शेवटच्या दिवशी या यादीत आणखी काही धक्कादायक नावांची भर पडू शकते.
या निवडणुकीत प्रार्थमिक कृषी पतपुरवठा व वि.का. सेवा सहकारी संस्था तसेच धान्य अधिकोषसहकारी संस्था यांचे प्रतिनिधी म्हणून जिल्ह्यातील सर्व तालुक्यातील प्रत्येकी १ प्रतिनिधी निवडला जाणार आहे. नागरी सहकारी बँका, नागरी सहकारी पतसंस्था, ग्रामीण बिगर शेती पतसंस्था, पगारदारनोकरांच्या सहकारी पतसंस्था, प्रक्रिया व पणन सहकारी संस्था इत्यादी मतदारसंघातून एक प्रतिनिधी, वरील प्रमाणे अ आणि ब मतदार संघात समावेश नसलेल्या इतर सर्व सहकारी संस्था व व्यक्ती सभासद म्हणून एक प्रतिनिधी, अनुसूचित जाती जमाती प्रतिनिधी म्हणन एक, महिला प्रतिनिधी दोन, इतर मागासवर्गीय प्रतिनिधी एक आणि भटक्या विमुक्त जाती जमाती व विशेष मागास प्रवर्ग प्रतिनिधी म्हणूनएका संचालकाची निवड केली जाणार आहे. अशा एकूण २३ संचालक पदासाठी १२०० हून अधिक सभासदांमधून ही निवडणूक होत आहे.
३० जून रोजी दुपारी तीन वाजेपर्यंत उमेदवारी अर्ज स्वीकारण्यात येतील. या अर्जाची १ जुलै रोजी सकाळी ११ वाजेपासून छाननी केली जाईल. त्यानंतर २ जुलै रोजी वैध उमेदवारांची यादी घोषित केली जाईल. उमेदवारी मागे घेण्यासाठी २ जुलै ते १६ जुलैपर्यंत मुदत देण्यात आली आहे. १७ जुलै रोजी रिंगणातील उमेदवारांची यादी तसेच उमेदवारांना मिळालेल्या निशाणीचे वाटप करण्यात येणार आहे. २६ जुलै रोजी मतदान होणार आहे. २८ जुलै रोजी मतमोजणी होऊन अंतिम निकाल घोषित करण्यात येईल.
