नांदेड रेल्वे स्थानक की मद्यपींचा अड्डा? स्वच्छालयात आढळला दारूच्या बाटल्यांचा खच; प्रशासनाचा भोंगळ कारभार चव्हाट्यावर

श्रमिक एकता न्यूज नेटवर्क नांदेड: ३० ऑक्टोंबर २६

दक्षिण मध्य रेल्वेच्या नांदेड विभागात सर्वात वर्दळीचे मानले जाणारे नांदेड रेल्वे स्थानक आता मद्यपींचा खुला अड्डा बनत चालले आहे.स्थानकावरील सार्वजनिक स्वच्छालयामध्ये चक्क दारूच्या रिकाम्या बाटल्या आणि ग्लास आढळून आल्याने रेल्वे प्रशासन आणि सुरक्षा यंत्रणेच्या (RPF) कार्यक्षमतेवर मोठे प्रश्नचिन्ह निर्माण झाले आहे.

या छायाचित्रात स्पष्टपणे दिसत असल्याप्रमाणे, स्वच्छालयातील बेसिनवर दारूच्या रिकाम्या बाटल्या, पाण्याच्या बाटल्या आणि प्लॅस्टिकचे वापरलेले ग्लास अस्ताव्यस्त पडलेले आहेत. संपूर्ण बेसिनवर अस्वच्छता आणि घाणीचे साम्राज्य पसरले असून, ही परिस्थिती रेल्वे प्रशासनाच्या स्वच्छतेच्या दाव्यांची थेट पोलखोल करणारी आहे. हजारो प्रवासी दररोज या स्थानकावरून प्रवास करतात, ज्यात महिला आणि लहान मुलांचाही मोठा सहभाग असतो. अशा गजबजलेल्या सार्वजनिक ठिकाणी मद्यपींनी उघडपणे दारू पिणे आणि बाटल्या तिथेच टाकून जाणे, हे सुरक्षेच्या दृष्टीने अत्यंत गंभीर आणि संतापजनक आहे.

रेल्वे स्थानकावर २४ तास गस्त घालण्याचा दावा करणारी रेल्वे पोलीस फोर्स (RPF) आणि साफसफाईचा ठेका घेतलेले कंत्राटदार नेमके काय करत आहेत? असा संतप्त सवाल प्रवाशांमधून उपस्थित केला जात आहे. रात्रीच्या वेळी किंवा गर्दीच्या वेळी या स्वच्छालयांचा वापर करणे सर्वसामान्य प्रवाशांसाठी आता पूर्णपणे असुरक्षित झाले आहे.

रेल्वेच्या वरिष्ठ अधिकाऱ्यांनी या गंभीर प्रकरणाची तत्काळ दखल घेऊन संबंधित स्वच्छता कंत्राटदारआ णि कर्तव्यात कसूर करणाऱ्या सुरक्षा रक्षकांवर कठोर कारवाई करणे अपेक्षित आहे. सार्वजनिक ठिकाणी मद्यपान करणाऱ्या समाजकंटकांचा तातडीने बंदोबस्त न केल्यास प्रवाशांच्या हितासाठी तीव्र आवाज उठवला जाईल असा प्रश्न प्रवाशांमधून उपस्थित केला जात आहे